Kamre k koney pe khade,
logo k aakarshan se parey,
aate jaate logo ko niharte,
mere purane TV aur uske stand.
bachpan se jawani tak,
buniyaad se sans bahu ki kahani tak,
ramayan k do teen episode tak chalte ek teer ko,
nisankoch dikhate mere purane TV aur uske stand.
Guroor tumko tab bhi na tha,
jab aath (8) button k channello k saath tum aaye,
aur 100 channelo k remote se upgrade hue tab bhi,
antennae ghumwa k Durdarshan bhi tumne dikhaya,
aur padosi k cable k taar pe hook daal k zee star bhi.
Discovery dikha k gyan bhi badaya,
aur exams mein match dikha k anda bhi dilaya,
akelepan ka ram baan ilaaj the,
har mood k liye tumhare pass jawab the,
ghadi, chaabhi, chashma, purse,
sabhi ka tum ek the thikana,
keel, hathoda, screw driver,
aur na jaane kis kiska tum the khazana.
agarbatti ka sahara bhi tum,
foto frame ka aashiyana bhi tum,
CD, Cassatte, VCR, show piece ka,
maajhi aur kinara bhi tum.
Aaj LCD tumhari jagah diwaar pe tika hai,
2 by 3 ka kona soona dikha hai,
tumko hatwaya keh k ki jagah lete the,
par tum apna dukh kabhi kahan kehte the,
aaj ghar mein ghus k chabhi kahan rakhu yeh sochta hu,
aur tab tumko dil se yaad karta hu,
Alvida mere purane TV aur uske Stand.
